موقع الشاعر مشير السعيدي

موقع الشاعر مشير السعيدي

شعر شعبي

التبادل الاعلاني

السلام عليكم على بركة الله افتتح منتدانا المتواضع هذانرجو ابداء ارائكم الكريمه لانها تهمنا كثيراالشاعرمشير السعيدي

    زاغور الصل للعراق

    شاطر

    زاغور الصل للعراق

    مُساهمة من طرف المشرف العام مشير السعيدي في الخميس يونيو 19, 2008 3:29 pm



    زاغور الصل
    ـــــــــــــــــــــ
    سد زاغور صلك راح اشور بيك
    واخليك امنشور تعثر بظلـــك
    لان عصاة موسى البيدي مو ثعبان
    تبلعك من اهدها اوتكفر ابصلك
    صح مجروح كلي اوكل كترمطعون
    لكن طعنه مني اتشگگك كلـــــك
    هدني الخاطر الله اوكفني شر جبرين
    اوشر سوء اللحايه الذبحي يفتلـــك
    الجم فم كديشك يلكديشك هاج
    بلعني اوحشرجتله اوراح يوصلك
    للصره اللحيايه امعشعشه امن الدود
    اوتنورات فوگ الرگبه فصلــــــك
    يل عورات كلك وانا ثوب اعليك
    والاف السنين اعيوب ساترلــــك
    انه اتوازيت واجلال الصبر مفتوگ
    مابياش اخيطه اشلون اخيطلـــك
    چنت اوياك اكابر من تعيل اوياي
    بس بالموت مامسموح اكابرلـــك
    ياتل الملح گرب يجي اجويريد
    واجويريد چم صيموعه موعلـك
    انا احزام ظهرك وانا اخوك العود
    وسفه ابليس سيف اعلى اخوتك سلك
    تدري الليل جاي اوعاصف اوحالوب
    تتعب من يچلچل وَحَدك تهلــــــك
    كون انشد بعضنا اوعين تنطر عين
    بالنفطات گلي الياوكت تسلـــــك
    هو البيته جام شلون يرمي احجار
    گلي ابروح ابوك ابهل لعب شلك
    عمي احترم نفسك هذا لعب اكبار
    العب بره بيتي ابعيد وي حلــــك
    يوز امن الدسايس واللعب بالنار
    انه امن اغتاض اعارچ لو الف مثلك
    انه الماطيح وانا امنرد اموت اوگوف
    مايحتاج عني اهوايه اسولفلــــــك
    العراق انا العراق اعگال كل عدنان
    تغرف من تعوز اوغيره اچملـــــك
    كثرن شرد اعاتب والعتب شيفيد
    وانت ابكل أذان اثنعش ذابحلــــك
    ياقانون وضعي اوياسنن واعراف
    اويا قرآن ذبح اولادي حللـــــــك
    اعثرك والله اعثرك حوبتي اتعابيك
    تذبحني اوتظن ياسين يشفعلــــك
    عوف الدين اگلك انت مالك دين
    قران الجلاله اتشگگ ابنبلـــــــــك
    والله ابليس يخجل ياابن جبرين
    يكش مذعور من يتصابح ابشكلــك
    عَوَر دجار حتى القل اعوذ اتعوذ
    لاشيطان لاتمساح لاجمبازي يشبهلك
    لوله العيب واخجل وانه بين اجناب
    لحرج شيب ابوك امنرد اقسملــــك



    مشير السعيدي

      الوقت/التاريخ الآن هو الإثنين أغسطس 20, 2018 10:42 pm