من طرف محمد يامحمد
ــــــــــــــــــــــ
يصح طيب بعيد اتحسه موجود
اويصح موجود بالخسه ينـــــــاور
اوتصح نخله طويله اوتثمر الشيص
اوتصح شبرين نخله اوتطي ساير
اويصح زلمه فريضه اويعدل الميل
اويصح ابراي بيته انسان حايـــر
اوتصح اگبور شمه ابعطر اهلها اتفوح
اوتصح اگبور زاعتها المگابــــــر
بس حسين ماصح صنوه بالكون
ولا صنو الصدر ومحمد الباقــــر
&&&&&&&&
شكتب يبو صادق ياقصيده اعليك
يعگال العراق اوطولك ابطولــــه
خجل قلمي شيسولف عن خصال البيك
گتله اكتب يقلمي اشبيك معقولـــــه
گال اصفن اوچنك تكتب لعباس
مهو محمد حفيده اوگول التگولــــه
سيف اعلن طلاگه اوي الگراب اسنين
محمد ينتخي من دون هلهولــــــه
وانه اوشعري اودعائي اتوجهة لله
ابجاه حسين ربي اوحوبة اشبولـــه
تفتگ بالگصوا وي عتره الزهراء
وايد الذبحت اهل البيت مشلولـــــــه
من سفيان اميه اوشمر طف حسين
لحد محراب باقر كلها مشمولـــــــه
ابليس اليوم نفس ابليس طف عاشور
اوهيه الخسه هيه ابليس وذيولـــــه
اوهيه الخيل هيه الرگت صدر حسين
كرة عل العراق الشمر وخيولــــــه
يبگه الذيل ذيل اشما تسمته ايلوت
لنه من الاصل معوج شاهولـــــــــه
محمد يامحمد طفت عين اعداك
دنيا اواخره الذبحوك منعولـــــــــه
محمد يامحمد غص غريمك بيك
الف تبت يداه اوذمته مشچولــــــــه
محمد يامحمد فرهدونه اردود
وسيوف الغدر لليوم مسلولـــــــــــه
منقول الوطن باگوه حفنه سنين
اوحل وكت الاموال الغير منقولــه
محمد والخناجر ماتعرف العيب
ويدينه اطوال بس ياحيف مغلولــه
محمد يامحمد دم اهلنه ايسيل
ومطيره اومرام ابكرسي مشغولــــه
محمد يامحمد بالشوارع طوش
زلم واطفال بالتفخيخ مچتولــــــــــه
محمد وابن سام بالف خيبر عاد
وجيوش العروبه ابشمع مقفولـــــــــه
والمنه ايتفلهم لو يشيل اسلاح
صاحوا گبل سام العرب سبجولـــــــه
بغداد السلام اتصيح يهل الغوث
واهلنه الغيره عدهم خذت قيلولــــــه
سجدت على اعتاب الكعبه البتكساس
اوحج البيت الابيض للعرب سولــه
اذن الطرشه تطي ان كلت يالله
اوبس تگول رايس تفز منتولـــــــــــه
بس شيعة علي اوعيناك عد عيناك
كل واحد بالف معدود وفحولــــــــــه
راوهم هوايل ماذكرها اكتاب
عن حيدر فقط والله منقولــــــــــــــه
بعد امي اوثلث تنعام حزب الله
الحراير هلهلن والزلم صفگولــــــــه
مشير السعيدي
» الضلع والصراط
» الطف بين الشام والشام
» الحسين هويتي
» هوسات عامه
» الاخ العزيز مشير السعيدي وفقك الله وسدد خطاك فأنت صوت حسيني ناطق.... نتمنى أن يوفقك الله لما فيه خير لآخرتك قبل دنياك
» مجموعة ابو ذيات ومساجلات
» لمخ لص للعراق
» عايداني للعيد