چفت المهدي للامام المهدي عليه السلام

ـــــــــــــــــــــــــــــــ
اعلى شنهي اتلوم وانت شعندك ابگدي
نفرشهن على المكشوف كل العدك وعدي
افرش كلشي عندك واظرب بعشرين
واقبل من تقسمه اعلى اثنعش عـدي
تدري اوادري تدري ابحسبتك خسران
ترها اضعاف وزنك چفت المهدي
شبحه الدربه عيني اسنين يابو سنين
اوناذر لجله عمري اوكل ذخر چدي
چا شتريد مني امن ارد اغني اليوم
واعلگ شمعداني ابمولده الوحدي
مو ملينه حرنه الغوث يابا الغوث
اليلطم گلتوا كافر هندي ابن هنــدي
والطاف اعلى حضره وذب نذر دينار
گلتوا اوي المجوس اتكاتب اويدي
يزي اغتاض صبري اوطك عرج عباس
انوب اكفر واشور باليمس خدي
واجلي الزيف عنكم واطلع المضموم
لن شيعة علي التيزاب والتيزاب مايصدي
اوراح اهوال اسوي بمولد الموعود
الليله ازمر واغني اوبالقصيده احدي
وگلبها المناحه ابعرس ابن شداد
واذب اسود افعالك والبس الوردي
ثلث اگدور هلن يضون ابشعبان
ولچ ياروح افرحي اوهلهلي اوعيدي
اوهل عباس رابع چلتمام االهال
يگل للشمس نامي اوشرغدي ابسدي
وانا ابشعبان اجنن وانگلب مگلوب
والتذ وانتعش وارتاح من دردي
وازف للكون هلهوله ابحلگ مضنوك
وانزع ثوب حزني اوينفرج سعدي
وابشر امي ابگبرها المابچيت اعليه
ابشري ابخط امامچ قيدت جندي
واطش هيل ابفرحتي اوسِعد خضر الياس
ودي انچان تفهم تفتهم ودي
جرب يوم عاشر والطم اعلى حسين
او شوف اشلون يشفه الساري والمعدي
وتسودن مثلنه اوطبر ابعاشور
اذا مصدور تصحه اوگصتك تندي
واسمع مله جاسم وانتبه شيگول
تخشع وي صوته اويتضح گصدي
احچي ابزود زودي ابزند ابو السبطين
اوتعرف زين سيفك يلتوي ابزندي
لن زندي انفتل من دگ لطم عاشور
فرصه اولاتفوتك يابعد چبـــــدي
نصيحه ابلايه منه اونا الك ممنون
گول اعليه شيعي اورافضي اوزيدي
سفينتنه رهيه اويحدي بيها حسين
وبعصاة موسى ايجذف المردي
علگ هاي ترچيه اعلى اذانك دوم
طه ايصير ندك لو صرت ندي
اوبالك لاتهوس عكس اليهوسون
ارموا اتصيح وحزامك طسم بردي



مشير السعيدي