من طرف سفرت الله
ــــــــــــــــــ
كلشي نگدر بي نبيع اونشتري
وين ياسوگ اليبيعلكم وطــــــن
اوياوطن معروض عدكم بالمزاد
اويا مزاد ايبيع موطن بالعلـــــن
احنه من اشور عشاگ العراق
اوللعراق اشچم الف بالف انطحـن
ياضمير ايهيد لوباع العراق
والعراق اشلون ينسام بثمـــــــن
انا ابيع اليشتري ايصيح اشتري
انا ابيع اوربا كلها بسعف نخله اوصم تتن
لاتصدگ حتى من تسمع نبيع
احنه مابعنه اشكثر راحن واجن
مايبيع الگاع وعگاله الشريف
اوما يبيع الله اويدنگ للوثـــــن
سفرت الله اشلون ترفسها العباد
والعراق الكل نسل ادم صحـــن
من يبيع اويشتري ابعرضه اودماه
اومنهو يرهن غيرته ابسوگ الرهن
الباع باع اوخل يبيع المو شريف
والشريف اليشتري الگاع ابچفن
من يزيح العرگه ويهد العراق
والگصص بارض العراق اتعفرن
مثل ليله اوقيس حبينه العراق
اومن يصحي البلعشگ عاشگ دِمَــن
من يطفي النور واليضوي العراق
والنجوم البلفلك من شع طفــن
من يگول انباگ واتلاشه العراق
وامس دجله والفرات اتباوسَـــن
والجبل يرگض نحرسوگ الشيوخ
ابلهفت امفارج حظنها اودم بچن
مشتهي اشويثي تمر نخل الجنوب
اويدري ذ ي قار اشتهت تشرب لبن
صاح آخ اوصحنا عبدك بين اديك
اگبور اهلنه اوي العراق اتحزمن
گام شعلان ابطرگ دله اومظيف
ابغير حيهم گمگمه اوسيفه انتخن
وگفت الغيره اونخت وين البخيت
صاحن ابخيت المقابر ياوطــــــن
بيك حلفن يابخت شاره اوامام
مايساوم بيك من بيك اندفــــــــن
كل بحور الگاع صدگ ياعراق
من دجلتك والفرات اشطفــــــــن
نعلگ العشره شمع لوخف ضواك
اوگص نگصهن لو لغيرك صفگن
هربجي كرد اوعرب نخب العراق
اوتخرس اصوات التناحر والفتــــن
تخرس الدنيا اذا يحچي العراق
اومن يسولف لو ازمورك سولفن
منهو يگحمنه لون طگ الرصاص
الموت يختل وي صوت الهلهلــن
نلبس الغيره درع شيب اوشباب
اوكل عراقي ابغيرة الگاع انعجن
والشوارب عيب تكشخ بالخنيث
اولام وتلوگ اعلى زلمه الماذعـــن
السيف مو سيف اليزنجر لو يبيچ
السيف سيف الينحني ابظهر المحن
وانت بيك الموت يشهك واستغاث
والمنايه ابين ايديك اتشاهـــــــــــدن
والله ماينسام بالسبعه العراق
اوسبعة الله امن العراق اتيمِمَـــن
مشير السعيدي
» الضلع والصراط
» الطف بين الشام والشام
» الحسين هويتي
» هوسات عامه
» الاخ العزيز مشير السعيدي وفقك الله وسدد خطاك فأنت صوت حسيني ناطق.... نتمنى أن يوفقك الله لما فيه خير لآخرتك قبل دنياك
» مجموعة ابو ذيات ومساجلات
» لمخ لص للعراق
» عايداني للعيد