من طرف اسروب الهم
ــــــ
اهمومي إوياي تِمشي إسروب تِتلَه إسروب
ماشت عن طِريجَه سِرِب عَني إبعيد
سِرِب هَم إلعِراق إوسِرِب ذيچ إلناس
إوسِرِب وياي بالغربَه حِلَف هيهات عني إيحيد
خاواني إونِصَبلَه إرواگ وي مَمشاي
إوخَلاني دجاجة ماي بين إجعازه وإجويريد
يِدِح بيَه إلحِزِن وإلشوگ هَد إلحيل
وأجر حَسرَة يِتيم إلماچِسوه إبعيـــــد
إمخالَف فولَه تِهشِل بالدليل أرداف
وإلتِخطي تِجيني إمنيشِنَه إعلى إلجيـــد
مِتوسد إلعِراق إوسادة إلعِريس
إومن دِهلَة فراته إمحني چَف الايــــد
إوكِل مصباح أشوغَن شوغة إمودعين
وأسمَع خَذِف گلبي إتگول دَوي إرعيــد
دِست إلليل وأغفَه إبنَغَم صوت إلذيب
مالَفيت راسي إولا هِبِت صِنديـــــد
بَس أخرَس وأصيراً مِثِل دود إلگاع
لله إولِلعِراق إلوطن كون إيريــــــد
لأني إبلا عراق إعلى إليِسار أصفار
غِصِن صفصاف تِلفَح بيه سموم إلبيـــد
إولأني إبلا عراق إبلا هويه إودين
وإلي إبغير ذَني هَم صحيح إنسان بَس شِيفيد
تِزِم إشفاي تِرجِف لوجِبِت طاريك
إويَظَل إسمَك على إلساني صَدَه إوتَرديــد
وإذا غَنوك ناي إسويحلي إومَوال
أنا إوذان أوذِن بيك وبطَرت إلفَجر تَجويــد
انا أوياك مو بَس وطن وإستيطان
انا اوياك توم إخوان روح إبروح وإنته إتزيد
وأنا إبخوص شِكّر گَمِطوني إوياك
وأشهَگ بالغُرُب يَعراگ مِن تِجذِب نِفَس تَنهيد
بيك أطباع ماهي إبكل سِمات إلكون
إور إوبابل إوأشور وإبراهيم مِنَك أعلن إلتوحيد
إوبيك إلزاب والهاون بيك الدَلَه وإلناعور
إوبيك البرحي والديوان اوبيك الهور والعگيـد
إورمز الغيره بيك حسين وإلعباس
أوبيك الكاظم إمن إلغيض كلها إبكَظم غيضَه إتشيد
أوبيك إلمادبر من سيف داحي الباب
ذاك امظغبر الساحات يوم الويــــــــد
إوبيك أزلام يِخجَل منها ملك الموت
تِلتَف على إلمِنايَه إبشَمخَرت عِربيـــــد
إذاً حَگي أفتِخِر وأتشيم إبذيچ إلگاع
وإذا جَنَت عَدَن غير إلعِراق أوطان
أصيح أبصوت غيرك ياوطن ماأريــــد
مشير السعيدي
» الضلع والصراط
» الطف بين الشام والشام
» الحسين هويتي
» هوسات عامه
» الاخ العزيز مشير السعيدي وفقك الله وسدد خطاك فأنت صوت حسيني ناطق.... نتمنى أن يوفقك الله لما فيه خير لآخرتك قبل دنياك
» مجموعة ابو ذيات ومساجلات
» لمخ لص للعراق
» عايداني للعيد