الحسين هويتي

الحسين هويتي
ـــــــــــــــــــــــ
وشل ماي عيني اوجيت اطلبك ماي
لهات اجفوني يبست خادمك مضطر
اجيت اوحملي يضهد عشر نوگ اصحاح
وذنوبي ثجيله امن امشي تتطشر
امشي ابغير حيلي اويا علي العكاز
وانا ابغير حيدر بالهوه اتعثر
بلاني ابليس شاخص مثل ظلي اوياي
ابكل اوذان كـَشـَف عورته اوكشـَر
اجيتك باربعينك مشي اوي الزوار
بتراب المشولك روحي تتعطر
واتيمم صعيدا من جدم رجليك
يقين ابشسع نعلك كل نفس تطهر
واتوجه القبله اوقبلتي الشباچ
والگصه ابتربتك شرف تتعفر
اجيت انخاك نخوة زينب الحوراء
وانشغ يم ضريحك واغفه وادثر
اكيد ادير عينك لو سمعت الصوت
صوت اختك يفزعك لوچنت بالذر
امشي اعليك جدك وامك اوعباس
والحمزه اوحبيب اوعابس اوشبر
لاتكسر ابخاطر من يجيك ايزور
وانا امراد رايد مااريد اكثر
حتى احرز مرادك بالگبر وياي
ابتوقيعك هويتي ابصيحة المحشر
رصيدي من الاعمال ايفشل اوخلصان
بس حبك عقد يحسين ماصفر

ابطفك دوم اسولف وانرسم بشفاي
اوبيك الساني يلهج وارتجز واشعر
اوكل بيت الاكتبه القلم صاح احاه
يصفن من اسولف گطعت المنحر
اوكون اعلى المنصه ايمر ذچر عباس
اعد مرتين بيته ايصَيِح المنبر
رزيتك جرح تازه اوياي طول ابطول
بس اذكر رزية كربله الاخطر
من فرفح رضيعك وانذبح عطشان
اجاه للطف يغسله اورضعه الكوثر
سن جبريل سنه ابملحمة عاشور
مِحرِم سعى ابطفك والحَرم كبر
جمرة لضه ابصدري ابيش اطفي النار
وعيوني يباب اوحسره تتكسَر
يحسين اعلى بختك گلي اي مبخوت
خل يرتاح گلبي اوينسعد وانسَر
ابعصرة گبري ليلة وحشة التوديع
من يحضر نكير اودفتره اومنكر
بس اشهدلي خادم فاطمه الزهراء
وصيه ابدسكره اوممنون لو تحضر
غره انت بجبيني اوعترتك عنوان
اوصك حيدر جواز ايسهل المعبر
چانه شعندي غيرك وانا اباهل بيك
شيعي امزنجل اسمي ابسلسلة حيدر
اكشخ بيك جاه ابحشر راعي الجاه
بل تكفيني عزه امن اكشخ ابقنبر
هسه ارخصني ابشر شيعة الزهراء
محامي حسين عنكم عين الاكبر
مشير السعيدي