من طرف خدر العراق(باستثناء الشرفاء)
ـــــــــــــــــــــــــــــ
من فگهت الصوت گالولي العراق
من يشور يوجع اويصطر صطر
ماچهبته ابيوم خايف من بعيد
اومن بعيد اگباله ادنج واعتذر
من يمر طاريه اركعله ابخشوع
گلبي يرجف وحده اويطفر شبر
لنه شامخ طوله من طول الحسين
وكل شموخ اگباله يطلع بي گصر
بالعراق اطفوف واحنه المجرمين
العراق حسين واحزابه الشمر
حسين كافل هيبته اوحر العراق
واحنه عرينه العراق امن الخدر
المد اديه اوعرينك فاسد دماه
ابشيلة امه انچفنه ونطمره ابگبر
اوتحرم اعليه الصلاه يوم اليموت
اويحرم الكافور والمي والسدر
الماتهزه الغيره ويندهه الضمير
هذا من زود الزلم كلش حذر
والي ماتعرگ جبهته امن الحرام
بالمبادىء مورقم ياخذ صفر
والي من ذني انغسل اغسل اديك
من ضميره اوغيرته اوعنه اشتمر
ثق ينجس دجله ويعفن الفرات
اوهل الشچول ابليس يمهم ينثبر
والله خيرهم فلا ثمنه ابرخيص
اوللرخيص اگبالهم يعله السعر
زين امنه انمصختوا من الضمير
ادماغ ماكو ايميز الشط والجسر
من يغب الراس شيفيد البهار
اويابهار ايفيد وي راس الزفِر
والسياسه اليوم غبت بالعراق
اوبعض منهم مهنته الفعل القذر
راح اسمعكم حچي ايفك الحديد
ياسياسي الضمير المستتر
چنه ويالجار لوجار الزمان
انصوم حول اوحولهم يصبح فطر
نجسم ارغيف الخبز وي الفقير
الباب حوشه ايروح ويشبعه الجدر
والمظايف عامره اوتزهي الدلال
الغـَرَب اتودعه اوتظيف المنحِدِر
والطعام ايحيل وانسيس اليزود
والگواصر دبس تبچي امن التمر
والفرات ايفور موحان اوربيع
اودجله وي زرت السمچ ماينعبر
اوچنه ننزع ثوبنه اونچسي اليتيم
اونحمد الله النعمته اوذاك الستر
ردت الوادم گري اتحطب وگود
والعوايل نومها اوگوف اوخشر
ابكوخ تسكن والگصب صاير شحيح
لو بخيمه امزرفه اتذري اوتخر
اوبعض ناس ابيوتهم محجر سجون
قرفصاء اتعيش كل خمسه ابمتر
ساتر اعليها البطل وكت الظلام
شعب يسبح بالنفط لكن فگر
ايسود الله اوجوهكم يوم المعاد
لاعمر شيد ولاحيدر قصر
عوذه مصيتوا الوطن حد النخاع
اشياف صار اوماسلم حتى الگشر
اشما نهشتوا ايظل يشلل باللهات
يلسع اويچوي اذا يغضه الجمر
والسبع لو طاح يولاه الجبان
الحوم يلعب لوغفه ابعشه الصگر
گوم وذن ياشعب صوم السكوت
اوگوم شور واتفل ابزيج الكفر
العراق البيه شعب مثلك غيور
اشم يبقه اوداعتك طول العمر
مشير السعيدي
» الضلع والصراط
» الطف بين الشام والشام
» الحسين هويتي
» هوسات عامه
» الاخ العزيز مشير السعيدي وفقك الله وسدد خطاك فأنت صوت حسيني ناطق.... نتمنى أن يوفقك الله لما فيه خير لآخرتك قبل دنياك
» مجموعة ابو ذيات ومساجلات
» لمخ لص للعراق
» عايداني للعيد