احبك

احبك
ـــــــــــــــ
انت اجروحي كلها اوانت بلسمها
لان عشگك نفضها اوزال كل همها
بيك ايهيد المها اوبيك بس ترتاح
مد ايدك عليها اوصير مرهمها
هاك اسنين عمري اوهاك باجي الروح
حن انت عليها اوياك رهمها
كاسرها اعلى عمرك من فداك الروح
بس يمك تهود من تنادمها
ورطه اوبيك ورطها العشگ وابليس
ليش اتريد منك ولفي تحرمها
وصلت عاد حدها اشلون تالي اوياك
راح اكفر ابروحي اوبيك ايتمها
احبك والله احبك ثق اذوبن بيك
ياغنوه حياتي الدوم اتمتمها
تفگدك من تغيب اوتنشد اليمشون
تحييها تريد اتريد تعدمها
ادور الروح من يوم العرفتك بيه
بيك الله ابتلاني اوليك سلمها
منك مااتوب اولا اريد انساك
دمنت روحي بيك اشبيك تلچمها
صح تسوه ابجمالك ست سبع نسوان
اوصح حسنك وحگك غيد لاجمها
بس تدري التواضع ميزت الطيبين
والطيبه اعلى گصتك ربي راسمها
غزال اشلون اوصفك والغزال ايغار
من طولك اوطولك عيني خاصمها
أدعي لومشيت اتميد بيك الگاع
ابكل نگلة جدم شبرين ثالمها
وعيونك رصاص ايثور لو صديت
انعمله اعلى الرموش اصواته كاتمها
دقره اسرود گلبي اشكثر بيها اسرار
شد واحد الواحد وانت لتمها
راح انتحر وافتك وانتعل وارتاح
وانت ابدمع عينك روحي يممها
ذب منها التذبه اوشل بديك الزين
يالحبك حياتي اسنين حوسمها

مشير السعيدي