وادي السلام للامام علي عليه السلام

ـــــــــ
ينشدني اليكرهك ليش اذوب اوياك
كتله عناد احبه چي تكرهونه
بس هي الحقيقه امن الصلب نهواك
لكن گوه اعاند وافكس اعيونه
اصحه اشبيك كتله الياوكت غافين
كتاب الله الصميدع يمته تقرونه
علي ابساگ العرش مخطوط فوگ اللوح
من نور الجلاله اللوح مظمونه
لافتى الا علي اولا سيــــف
الا ذو الفقار التعرف افنونـــــــه
توگه الدين غيره اوصار عدكم دين
بس الماله غيره اتوهدنه اظنونه
الشاهد باب خيبر من ترهدن بيه
امتونك شلعته لوشلعته امتونـــه
والخندگ يسولف عن علينه اقرون
چم ملعون زور وبن ملعونـــه
اگلوب الزلم وصلت طارف الزردوم
الحيد التوه السانه اوصرچت اسنونه
برز ثقل الرساله لثقل كفر الكون
حيدر هو حيدر وابن ود دونه
ماسل سيف حيدر سلت گلب الگاع
مهي السبعه اوارضها ابچفه مرهونه
چفاها ابعمر ابن ود بس حضر جبريل
اوخاف الله اوحكمته ابدنيته اوكونه
اوچاكلها ابجهنم شلع ذاك اليوم
يطويها اويسلم لله كيلونـــــــــــه
علي اوشحچي ابعلي وشلون الم معناه
واخلاقه ابمحمد عجن معجونه
لذلك امنه ابيوم الغدير الدين
لن يدري الصميده ابهامته ايصونه
اولن يدري الولايه اولام داحي الباب
يلوگ الها اوعلى الباقين مخبونه
مامد يوم سفره اوجامل الشبعان
اويفرش للفقير اسماط قانونه
ماسرفن اذراعه اوقدموله اشكال
خبز اشعير يابس زاد ماعونه
من يسجد علي ينخطف لون الكون
كل الكون يضوي ابسحنته اولونه
حيدر والصميدع علي او داحي الباب
وابو تراب الكلايف علي ايكنونه
مو كلمن تشلبه اعلى الفرس ينهاب
ينهاب اليبين بالوغى افنونه
والتاريخ سولف عن علينه اشكال
صفحاته ابعلي التاريخ مفتونه
والحاضر ضريحه الصار كعبه الناس
اوزواره ابحماه اتنام مامونه
وبوادي السلام امشرغده الميتين
وتطوف اعلى گبره اوهي مدفونه

مشير السعيدي