تاميم الدين للامام الحسين عليه السلام

تأميم الدين
ــــــــــــــــــــــــــــــ
الدم من يسيل ايموت مابيه روح
يتلاشه اونظل انعيد سالفته
بس دمك خريطه الكل شبر بالگاع
لاجف لاتلاشه اولاهي شاربته
بعض الدم عفن لكن نعم ينشاف
دم ازرگ لان الگاع زايعته
اودم طاهر سماد ايورد الوجدان
اوربط كل حي ضمير اوياك قافلته
خالد ظل دماك اشما خلد جبريل
وي در الحليب اجيال راضعته
بالكاروك وتلوليي المهد يحسين
الساني امن النطق لهواك صومته
واول مانطق وشفاي رسمت صوت
لهج باسمك الساني اوبيك فطرته
تهموني ابهواك اوگلت اي حبيت
اوعشگي اعلى اثنعش معصوم قسمته
فصيلة دمنا وحده اوياك مشتركين
أو زائد حسين اونسل والدته
غسل وجه الضباب اومطر دمك نور
صاح الموت حيهم وانت شيمته
نبط عرج الهواشم والطف اتنخاك
لبيت النداء اوبيك يممته
وريث الدين شرعا بالارض يحسين
باگوا دين جدك وانت أممته
مركب دين طه اوچان طه اشراع
من مال اوعلاه الروج شلهته
صرت انت السفينه اوبيك منجه الناس
مامون الركبها اوعلت مرتبته
تاريخ البشر سولف شرف وامجاد
وانت لوحدك تاريخ سولفته
صفحت غيره طفك طرز التاريخ
اوغصت من عديم الغيره مزبلته
علي قران ناطق والف باء الدين
آياته عترتك وانت بسملته
فتگ اهل السقيفه ابخيط مايراف
بالطف لا صحت والفتگ خيطته
انثلم دين السلام اوذبل ورد اصباه
جومته ابرضيعك وانت چرچبته
دكان الغدر بالشام من فك باب
بچف عباس بالعباس عزلته
حكم شرعي استنادا لآية التطهير
ابشمع احمر مدى التاريخ شمعته
يزيد امتدت ايده اوصافحتها الناس
وانت بخشم سيفك صفع صافحته
يزع صبرك تشاهد يلا شلت السيف
والسان التماده اعليك وشرته
نبي ابراهيم ماقدم نذر مذبوح
اونذرك بين اديك الطفل قدمته
السمه نزلت تلگت دم ضناك اجلال
ابعرش ربها اتباها اوهيه شايلته
بجنحين الملك من هبط بالتنزيل
وانت اعلى الرمح لسماك رتلته
لجل دينه شريف الينذبح يحسين
وانت ابكربلاء الدين شرفته
ياثوب الشهاده اتلوگ نكشخ بيك
اوظمن من بيك يكشخ حِسِن عاقبته
اهو ياثوب غيرك فصله المعبود
گد چيس اوسبيل اوستر عاشِگته
دنيف حسين گلبي امتيم اوولهان
ابعشگ حسين شيعي الگلب نظمته
ابيمينه حسين نايم وبيساره حسين
وانا ابظهر ابوي ابحبه زقفلته
حسين اول اواخر من سكن بالروح
ابعرش الروح امير الروح نصبته
لذلك عل الملاء هاك استمع تصريح
خادم للحسين اوخدم مملكته


مشير السعيدي