قصيدة گصيبه اوموت

گصيبه اوموت
ـــــــــــــــــــــــــــ
مَر بيه الوطن شفته ابحلم تعبان
ضهد بالموت حيله اومنخطف لونـــــــه
يتعكز لگيته اوعين تزرگ عين
تنزف دم لهاته اوتصرچ اسنونــــــــــــــه
مثل الطاح بيته اوفرهدوه غمان
يفتر طوط حيه امتيه اضعونـــــــــــــــــه
شايل شفته بيده اتلث گصايب سود
اوشفته ابدم شبابه امكحل اعيونــــــــــــــه
شفت ادموعه تنزل حبر وي الماي
اوشفت امچرچبات الجامعه اچفونــــــــــه
دنگ شال محبس سنسله اوخلخال
اوخد احمر ترف ومزوگ ابنونــــــــــــه
اوشال اهنانه دفتر غاد شال اكتاب
اوجنطه امن الرصيف ابحقد مطعونــــه
فك الجنطه شاف اهوايه بيها اشياء
تنهد حيل شفته اوهاجت اشجونـــــــــــه
طلع من بعضهن صوره بيها اثنين
عريس اوعروسه اشكثر مزيونــــــــــــه
لمهن فوگ صدره اونشغ نشغت موت
وگف مذهول صافن يحسب اضنونــــه
صاح ابيا جريمه الورد هذا ايموت
وبدمها الشعوب الورد يسگونــــــــــــه
بس احنه وردنا ايموت بالتفخيخ
والمامات واگف حي يدفنونـــــــــــــــه
صد الربه عينه اوصرخ يالله
بيتي اعيال بيتي الي يفلشونــــــــــــــه
موطنهم حِظِنهم والسنين اشهود
عجيبه اشلون موطنهم يذبحونــــــــــــه
ربوا بجروح نحري اوغفوا وسط احشاي
اومن شريان گلبي العز يرضعونـــــــه
اشما يتشاوه جرحي ايدمبل الملچوم
لايرضون اخيطه اولا يخيطونـــــــــــه
املاحف كون اخيطه ابستر ظلمه الليل
ردوا بالنهار اشكره ايفتگونـــــــــــه
صرت الهم نهر ريع لهات الگيض
والزاد ابحلگهم بي يبزونـــــــــــــــــــه
شربوا وارتووا حد وشلت الكشكول
غريبه ابكل وكاحه الماي يچفونـــــــه
ماد اسماط روحي امن ام قصر لربيل
تشكر من تضوگ الزاد بزونـــــــــــه
وانا الضاك زادي ايصير يغوي ابليس
يتمولس ضميره اوطاع فرعونــــــــــه
كلوا كل شي ابسفرتي اوگلت اظل جوعان
ماشح العراق ابعوز ماعونـــــــــــــه
شبعوا للتخامه او وگفوا اعلى الباب
سدوا باب بيتي اوطفوا چانونـــــــــــــــه
قرآن الوطن عل الرف تطرحه اشلون
والقرآن منزل حتى يقرونــــــــــــــــــــه
افتحه اوشوف وافهم حكمته اومعناه
واعرف ليش ربك وحا ابمظمونـــــــــه
الوطن يعني الشرف يعني العرض والدين
يعني البي شرف موطن هله ايصونــــه
يعني اصعب رقم بحساب كل الناس
مايقبل القسمه اشما يقسمونــــــــــــــــــه



مشير السعيدي