تجليبه للامام القاسم عليه السلام

القاسم
ــــــــــــــ
هاك السيف يبني اوهاك العمامه
تلوگ الهن يقاسم يارهي القامه
ــــــــــــــــــــ
يبني ايلوگ سيف المجتبى ابيمناك
صول اوجول بيهم لو دنوك اعداك
يبرلك اعيوني اوهاك گلبي اوياك
يبني اخلاف طولك تگصر ايامه
ـــــــــــــــــ
گصيره ايامه گلبي لوجفيته اليوم
لچن يبني اشبديه وهل تشوف الگوم
زحفت عل المخيم چنها سرب اغيوم
اوعمك ظل وحيد اوحار بايتامه
ــــــــــــــــــــــ
عمك ظل وحيد اوعين تخزر عين
اوشوف ارذال اميه استفردت بحسين
هذا ايصيح ثار اوذاك يطلب دين
يبني اعليك راسي انصاب دوامه
ـــــــــــــــــــ
اگلك روح اخاف اعليك تتخذم
يالعريس وترد لمك امدمم
انا امك اوتدري اخلافك اتيتم
ونشغ من تردلي امخضب الهامه
ــــــــــــــــــــ
لله الامر يبني اتوكل اعلى الله
طل لمك يجاسم بالحلم طله
توضه ابدمعت امه اتوجه اوصله
وتوشح ابسيفه وحضر اسهامه
ـــــــــــــــــــــــ
توشح سيف ابوه اوصاح عد عيناك
ابشر عمي ابشر بالعزيزه افداك
شلي ابدنياي ياسبط النبي ابلياك
لخلي الجيش يعلن بالطف اسلامه
ـــــــــــــــــ
صال اويرتجز ويگول حي الموت
عشره اطيح بيده اوعشره وي الصوت
تنس منه الفطاحل لوبرز بسكوت
وبخيت اليضبط بالوغى احزامه
ـــــــــــــــــــــــــ
من يثبت اوجاسم روعة الكرار
ماخذ من ابوه الهلا ابهل خطار
كرم ضيفه ابوريده اگبال باب الدار
ولا ضيفه اللئيم ايندس اخيامه
ـــــــــــــــــ
عن خدر الفواطم دافع ابروحه
يوصي حسين بحسين ونسه اجروحه
اخو خيته التدنه اويگدر ايلوحه
باخير الجيش سيفه اويسرته ازمامه
ـــــــــــــــــــــــ




مشير السعيدي