دروس الطف منبريه عكيلي

دروس الطف
ـــــــــــــــــــــ
عد زينب يحسين اطفالك
مامونه اولاتشغل بالك
ـــــــــــــــــــ
مامونه اطفالك عد زينب
لاتهتم يحسين اوتغضب
يندهلك يحسين الملعب
سيفك جرده اوفوت ابفالك
ــــــــــــــــــــــ
جرد سيفك وحصد بيها
دوس اولها اوحش تاليها
جرد روحه المايطيها
اوملك الموت الظل وخيالك
ــــــــــــــــــــــ
ينعت وتناديك الروس
قبضت لملاگاك فلوس
خلهم عبره اوخلها ادروس
تنهل منها ادروس اجيالك
ــــــــــــــــــ
خل تدرسها اجيال اجيال
ماينفعهم جاه اومال
بس الواله العتره اوآل
يدخل للفردوس ابجالك
ــــــــــــــــــــــ
طفك خالد بالتاريخ
اوگبتك تصعد للمريخ
تقره ادروسك بوذه اوسيخ
يرسب كلمن مايقرالك
ـــــــــــــــ
گام حسين اوشد ابمهره
انزل گالت يبن الزهره
باست گصته اوشمت نحره
يرعاك الباري اويبرالك
ـــــــــــــــ
گالت هاي امن امك صوغه
وصتني اوشاغتلك شوغه
تدري امك گبلك ملدوغه
وانت ايغيب الليله اهلالك
ـــــــــــــــ
سلمني اعلى امك يالغالي
واشرح عد ياسين احوالي
اخلافك گلهم ماظل والي
واحتارت گلهم بعيالك
ــــــــــــــــــــــ
وصل خويه اوياك الحيدر
بالطف يرضه اليوم اتمرمر
بلكي اتبلغه اوبلغ شبر
عن احوالي اوعن احوالك

مشير السعيدي