ليرة ذهب للامام المجتبى عليه السلام

ليرة ذهب
ــــــــــــــــــــ
متهومه القصايد ماوفت وياك
لكفر بالشعر من كون مايوفيك
كل شاعر يجحدك جحد بيك الدين
خرسات القصايد لو نست طاريك
ياسادس فرض والفرض ماننساه
مثل ركن الصلاة اليجحدك يقضيك
يادلو الفضيله اوبيرك الكرار
راوي الناس جود اوحيدرك راويك
ياباب المظايف والكرم بي باب
رب البيت ضيفك وانته ضيف اعليك
يضحك باب حوشك من يدگه الضيف
ويشرع اويفرش للفه اوعانيك
اصل الحِسِن انته اويوسف التشبيه
مانصفوك ذوله الچانوا امشبهيك
طبق الاصل عنك صورته استنساخ
يوسف چان عاكس للوسامه البيك
يوسف مو الاهك يوسف امسميه
وانته الله ابجلاله شُبر امسميك
ياسيد شباب الارض والفردوس
وبهاي الكرامه حسين اليساويك
من يا نوع معدن صبك الرحمن
تيزابك علي اوخير البشر طاليك
ياليرة ذهب زينت جيد الدين
يازنجار يگدر ياذهب يصديك
رسله اوانبيائه ابسور مذكورين
وانت اكتاب ناطق ماخرس قاريك
ياسِجاد عرشه اوجنح جبرائيل
ينطح بالسراب الفارغ اليطويك
راد ابليس اميه يراودك نوبات
يخسه ابليس الاصلي ماگدر يغويك
موشيطان واحد لو الف شيطان
تركعلك ذليله اوساجده اولبيك
حور اوعين واشراف البشر بالگاع
فدوه تروح لتراب الحدر رجليك
نقسملك قسم بچفوف راعي الجود
مرزاب الدموع ادموم من نبچيك
هانت واليگمطن بالزلم حرات
گبل الصوت نصرخ يالحسن شبيك
بيد المهدي راية سيدي العباس
بالاف القصايد زحف من نحديك
والزهره ابقدرها اتگوم تحدي الناس
وبعرش الجلاله امن السم اتلوليك
ضريحك بالبقيع امسودنه الهدموه
مزار ابكل ضمير اوكل گلب بانيك
يلحارمني اطوف اعلى البقيع اسنين
ابهبية عاد ربك ياجبح يبليك
مثل اجداد ابوك الشمر وابن ازياد
ابسيف المهدي اذلك يانذل واتويك
واشچيك لخصيمك حيدره الكرار
وشيخلصك اوحيدر للعرش يشچيك
واگض منگاش بيدي اوسيف داحي الباب
اگص لحمك واشيش بالحشر واشويك
وانا اشرب عذب من حوض راعي الحوض
كوثر وانت سم اوزقنبوت اسجيك



مشير السعيدي