من طرف وَتـــــارَه
ـــــــــــــــ
إمعَرِت حيل بـِزياگــــه وَتــــاره
إبعودَه إلوَكِت لـَحَنــــي وَتــــاره
تارَه أنسَه وَهِد وِلفــــي وَتــــاره
أردلـَه إبشوگ ماصايِرجـِدِيَـــــه
ــــــــــــــــــــ
إشلون إلها ثـَغر وِشلون شافـــــات
إولـَها إرياگ إلجَميع إلعِلـَل شافات (حاج فزيع)
كون إبعارِضي إلشيبات شافــــات
وِقاراً وَأريَحيتي ذيچ هِيَـــــــــــــــه
ـــــــــــــــــــ
مَر إولايـِمرنه إلتـَرِف شافــــــات
وَلاساعَه دَمِعتي إعليه شافــــــات (حاج مطرب )
نِكَر ماچَن هَذيچ إلعين شافــــــات
وَلا چانـَت مَعاه إشروط إلِيَــــــــــه
ــــــــــــــــــ
عَذِب سَلسَب رِضاب إلتـَرِف شافات
إوعين إلها إلتِخِزرَه أبساع شافــــات (مشير)
صَدِر مَرمَر إوجيد إلرشا شافـــــات
حِسِن ليلـَى حَبيبي إلعامِرِيَــــــــــــــــه
ــــــــــــــــــ
عَلامَه شِلـَه وسط إلروچ بَلمــــــاي
إوعَلـَي لـَملـَم زِماني آفاة بَلمـــــاي
إلبَلـَم ظـَل إبمِچانـَه إوطِفِت بَلمـاي
إمسَيِس وِإلرِگوگ إتلوچ بـِيَـــــــــــه
ـــــــــــــــــــ
عَدِل ماتِلتِفِت عينــــــــــي وَلادر
وَلاعمري إملـَكِت فـُضَــه وَلادر
إبغربَه لاأهَل يَمــــــــــــي وَلادر
وين أنوي إلظلام إمحيط بيَــــــــــه
ــــــــــــــــــ
أبدا ً ماخطيت إلجـِدَم لـَدنــــــــاي
إلوَكِت غـَفلـَه دِفـَعني حيل لـَدناي
إلعَزِم بالله لـَشِد حيلين لـَدنــــــاي
إوثالِث حيل لِلمِزوي إبثِنِيَــــــــــــه
ـــــــــــــــــــــ
ــــــــــــــــــ
إلمُصايـِب مِن زُغـُر وَياي شَبَـــــن
إومِن عِدهِن سِفـَه عَيناي شَبَــــــــن
إشكُثـُر نيران حَدر إحشاي شَبَـــــن
إلفُگـَر مِنهِن وِخوتي إشهَل بـِليَــــــه
ــــــــــــــــــــ
مِن ظيمي سِجَدلي إبليس وَألجــــان
إفلـَسِت مَملِك بَعَد دولار وَألجــــان
إلعُمُر خـَلـَص نِحيب إوأوِن وَألجان
عِسر وَطحِر وَهوي إوتوم بـِيَـــــــــه
ــــــــــــــــــ
حِسِن وِلفي يـِناظِر حِسِن عَـــــــــذراء
إوعِشَگته عِشِگ مابيه دَغَش عَــذراء
دُعائي بالصلاه وإلصوم عَـــــــــذراء
أجَل إنتِ دُعائي إلبيه تـَقِيَــــــــــــــــــــه
ــــــــــــــــــــ
أعِس بالأه طول إلعمر عَس عَــــــس
شِبِه ليل إلوَكِت وَياي عَـــس عَــــــس ( رعد البصري )
عَسَه گلبي إلسِلـَه إلمَحبوب عَس عَس
أسِل وَرتاح خَل موتي إبشِجـِيَـــــــــــــه
ـــــــــــــــــــــــــ
أعَس عَسَك وَأعِس إلعيس عَس عَس
وَعِس ليلاك إذا ليلاك عَس عَــــــس ( مشير السعيدي )
تِنخـَه إنتـَه إبسِلـَه إلمَحبوب عَس عَس
عَسى عيسى يـِحِطـَه إبين إدَيَـــــــــــــــه
ــــــــــــــــــــــ
شِبه إلعيس عَسَك صار وَأتعَــــــــــس
إلي حَنظـَل إبريجي إوصَبر وَأتعَـــس ( مشترك)
لابيهن وَمض ينشاف وَأتعَــــــــــــس
أظلـَم من رَحَم ليلي عَلـَيَــــــــــــــــــــــه
ـــــــــــــــــــ
شِفِت أغيَد تِوالي إلليل خالِـــــــــــــــد
إورَسمَه إنطبَع بالدَلال خالِــــــــــــــد
أشو حَچيَك نـَتر وياي خالِــــــــــــــد
لِگمتي إوظـَحِچ إلوادِم عَلـَيَـــــــــــــــــه
ـــــــــــــــــــــــ
إمغـَيـِم مادِفِت بالفـَرَح حَنـــــــــــــاي
إلشوفـَك ياسَليم إلذات حَنــــــــــــــاي
عَلـَي يَفلان عَظمَك صار حَنــــــــاي
شَحَم عيني أهمِلـَت وَفتِكَت بـِيَــــــــــــه
ـــــــــــــــــــــــ
وِصَل صارَت جَميع إعضاي وَحشاي
أعِس وَملي إبجـِرِب مَزروف وَحشاي
إشكثر طيب إزرَعِت بالناس وَحشاي
بَس نِكران وَأفعالٍ رِدِيَـــــــــــــــــــــــــه
ــــــــــــــــــــ
مَدامِعنـَه تِهِل چالسيل عَزَيــــــــــــــن
إورَخـَصنـَه إلزين أبَد عَل زين عَزَين
إلعِواهِر مِن جـِفينـَه لِفـَن عَزَيــــــــــن
شِماتـَه أشكار طـَبع إلسَرسَرِيَـــــــــــــــه
ــــــــــــــــ
إلكِل مِنـَه إبزِمانـَه حيد چــــــــــاذب
إوعَلينـَه جَدِمَوا مِن چان چـــــــاذب
تِف إعلـَه إلوَكِت يَفلان چــــــــاذب
إمنديه إلزين وَعلـَه إبن إلدِعِيَــــــــــــــه
ـــــــــــــــــــــــ
يحظي وين ادورنك ولاجيك
لاانت التجي يمي ولاجيك
اريد اوياك لطميه ولاجيك
عليك الطم ولك والطم عليه
ــــــــــ
ابحور ايفوز ميت الهوى والعين
حبيبي اعليك الوجن دوم والعين
اله مبسم يهز روحي واله عيــن
سيف اتكول خزرة عينه اليه
ـــــــــــــ
العشك بلوه العشك ياناس ودها
وي روحك حبيبي الروح ودها
مكاتيبك حبيبي ارجوك ودها
الي ابجنح الحمام الجاي ليه
&&&&
وحگ الالف ثم الميم والعين
يلوج اوماهده الدلال والعين
ماتشبه لانس اوجان والعين
الوگ اعليك وانت اتلوگ اليه
مشير السعيدي
» الضلع والصراط
» الطف بين الشام والشام
» الحسين هويتي
» هوسات عامه
» الاخ العزيز مشير السعيدي وفقك الله وسدد خطاك فأنت صوت حسيني ناطق.... نتمنى أن يوفقك الله لما فيه خير لآخرتك قبل دنياك
» مجموعة ابو ذيات ومساجلات
» لمخ لص للعراق
» عايداني للعيد