من طرف امــــــي
ــــــــــــــ
امي اعيوني ذني اوذني الضلوع
وامي اسوار بيتي اوشبت الـــــدار
شمعه امي اوتذوب الخاطري ادموع
تطفه اوهي تشعل بيدها النــــــــار
الخير اشما يشح بيد امي نهران
ايفيض ابقدرت الله الخير مـــــدرار
همه اهوايه عدها اوعزم كادود
متحزمه ابصبرها اشصار ماصار
وامي امن الصبح وي صوت الاوذان
توگف چنها نجمه اوتخبز اشيـــار
من يخلص خبزها اتصيح يولاد
عدكم بالمضيف اليوم خــــــــــــطار
تنشغ تفرح امي ابجيت الضيف
اودوم اتوصي بينا الجار للجــــــار
فرحانه اوحزينه ادموعها اتسيل
اوتطگ ادموع امي ابدارنا ازهـار
اشوفنها بخت ويدور بالبيت
امي اورحمة الله ابيتنا انــــــــــوار
تلولي اعلى الينام اسنين وسنين
كبرتوا اتگول يمه وچنكم ازغــــــار
خلگ ناعور امي اوصبر فلاح
تسگي الگيض دمعه ابشح الامطــار
تغفه الليل عين اوعين متنام
حارس عين امي ايطوف الاكتــــــار
بفراش المنيه اوعينها ادور
اوبنگوط النزاع اوخافيه اســـــــــرار
چنها اتگول همكم رايح اوياي
أكل عمري اوذبحني ابطبع منشــار
يمه اخلاف عينچ بيتي معفوس
اوصرنا اوداعتچ يايمه طشـــــــار
عشر اسنين يمه ابغير خوان
المسافه ابين اخوتي احسابها اشبار
غريب اوجنطه بيدي اهموم واهدوم
وافرنجي جوازي اوگومة اشعـــار
تايه بالغرب واذرع محطات
ومنيتي اموت ابهور ذ ي قـــــار
مشير السعيدي
» الضلع والصراط
» الطف بين الشام والشام
» الحسين هويتي
» هوسات عامه
» الاخ العزيز مشير السعيدي وفقك الله وسدد خطاك فأنت صوت حسيني ناطق.... نتمنى أن يوفقك الله لما فيه خير لآخرتك قبل دنياك
» مجموعة ابو ذيات ومساجلات
» لمخ لص للعراق
» عايداني للعيد