قصيده للامام علي عليه السلام بمناسبة ميلاده الميمون

اول العزم
ــــــــــــــــــ
منين ابتدي اوياك اوياشعر يحويك
لزموم امنرد اوصفك اختم القران
وانت اكتاب ناطق وانا ماقاريك
يعني اشما وصفتك توني بالعنوان
يامولاي يعني اچم قصيده احويك
بس الباء ماظن تخلص ابديوان
گبلي اهوايه كتبوا عجزوا ايوصفوك
شيوصفوك وي اول العزم صنوان
لكن راح اوصفك واليصير ايصير
اوخلها اتگول عني امسودن اوخرفان
انا المجنون بيك اوبيك عقلي انصاب
يا باء البدايه اوسورة الرحمن
ياسورة نباء والرعد والتحريم
والانعام انت اوسورة والفرقـان
ياغافر اوقاف اوواقعه اواحزاب
ياتين اوعلق واحقاف يالقمان
ياسورة الجمعه اونوح والاعراف
ياسورة سباء والنحل والانسان
اوياانسان غيرك يستحق مابيك
ابيا انسان مثلك طلگت النسوان
بيك الكعبه طلگت والنفخ بالصور
اوهزمهدك محمد سيد الاكوان
اولوله اعليك جبريل الملك بالبيت
اوصار البيت مهدك والعرش حيطان
اومريم ليل سهرت ياعلي اتباريك
اوهاجر بيك باهت كل انسها اوجان
اشتد بالبيت عودك والنبي امربيك
وانت اوي الرسول ابلا نقاش اخوان
طه الگال عنك منزلة هارون
ابو الحسنين مني لموسى ابن عمران
وانت الماتريد اشهود يوم الويد
مدرع جيش صدرك والظهر فرسان
خيبر والجمل والخندگ اوصفين
شي من بعض وصفك والبقن جروان
ذو الفقار يلظم من تصول الروس
اوبيدك بطل يليل بالنزال انهــــــــان
ياعصاة موسى اوستر خدر الدين
ماغرتك دنيا اوراودك شيطــــــان
آمنه ابصفاتك واتبعنه اخطاك
واركنا ابظهرنا الودر والتعبــــان
يابا الغوث اغثنا اشتدت الشدات
من ياهي اشتكيلك والحمول اطنان
طشتنا السياسه اوشفع بينا الموت
والذباح اخبرك والذبيح اخـــــوان
من كل زيج رگعه اتحاوشتنا الناس
من طنجه اونجد من سباء من تطوان
واحنه ابطرگ حبك نشگف ال ابليس
يلصمناك واجب وي شهر رمضان
عليك انطوف كعبه اوالف شوط اوشوط
بغضا بال اميه اوشلة العــــوران


مشير السعيدي